النسيان ..نعمة ؟؟ ولا .. نقمــــة ؟؟
سؤال بطرحه على زوار مدونتي
أعاني من نسيان مؤقت للاسماء..للوقت
مثلا لما اتكلم عن موضوع صار لي مااتذكر هو صار امس ولا اول امس ولا ولا
لما تجيني دعوة لمجلس الامهات لمدارس عيالي اجهز افكار ببالي بطرحها على المعلمات او تساؤلات
وانصدم اني ساكتة مااتذكر شي ولا حتى منهج اولادي شنو فيه
اعاتب نفسي لما ارجع واقول ليش يصير فيني هالشي؟
يمكن القي اللوم على العين والحسد من الناس اللي مريت بهم وعشت معاهم سواء بالعمل او من الاقارب
لاني ذكية واحفظ كل شي
ومرات اقول يمكن العمر له دور
بس وحدة من اهلي صكت الثمانين وذاكرتها مية مية وما تنسى شي ما شاء الله عليها
بس احلى شي في النسيان .. اني انسى اساءة الغير
طلبي من القراء اعطائي حل كيف اعالج مشكلة النسيان عندي
دمتم سالمين
الأربعاء، 31 أكتوبر 2007
الثلاثاء، 11 سبتمبر 2007
كل عام وأنتم بخير

اعزائي زوار مدونتي المتواضعة
كل عام وأنتم بخير بمناسبة شهر رمضان
والله يعيناعلى صيامه وقيامه
جانا رمضان شهر القرآن ولازم نستغل كل لحظة فيه بالعبادة وقراءة القرآن
والمفروض كلنا نفترض ان جميع اشهر السنة رمضان
جبت لكم هدية واتمنى منكم قبولها
مجموعة مصاحف فلاش ، وبها إمكانية التكبير و التفسير
والافضل تحفظونه بالمفضلة
http://www.quranflash.com/
والموقع لا يحتاج للتسجيل .. ادخل واقرأ وردك اليومي
احبكــــــــم في الله
الجمعة، 7 سبتمبر 2007
النجار والمسمار
اخيرا وبعد طول انتظار استطعت ان اسرق من الوقت لحظات لاكتب موقف من المواقف الكثيرة التي تمر بي
قررت اكتب لكم قصتي مع النجار والمسمار
حبيت ازين جدران بيتي باللوحات والمرايا
دار الحوار التالي بيني وبين السواق
عاشقة : اسمع يا محمد روح الشارع الفلاني ودور لي على نجار مزبوط ههههههه وخله يجيب معاه دريل
معلوم شنو انا كلام ؟
السواق : ها ماما معلوم معلوم
عاشقة : لا تنسى دريل زين
السواق : اوكي اوكي
بعد نص ساعة من الانتظار
الخدامة الفلبينية : مدام .. مدام .. درايفر كام وذ ذا كاربنتر ؟
(الترجمة (السواق وصل ومعاه النجار
كنت ارتب اللوحات ولما قلت للخدامة خليه يدخل
دخل النجار البنغالي وهو معصب ومكشر وعاقد الحاجبين
الصراحة تخرعت منه بعد لما شفت طوله تخرعت زيادة
تكلمت معاه ومسوية نفسي شجاعة
بكم بتركب اللوحة؟
تكلم وهو يهاوش : انت قول ؟
عاشقة : انا اقول بكم ؟ هذا شغلك مو شغلي
النجار وبعد اسمه محمد : لالالالالالالالالالالالالالالالا بغى ياكلني وهو يقولها انت كم يقول؟
عاشقة : لالا انت كم يقول ؟
تذكرت سالفة رفيجة ام خماس كم اخر .. اخر كم ؟؟
النجار العصبي : شوووووووف مسمار واحد برغي واحد انا ركب 20 ريال
قعد يعد اللوحات 12 لوحة انا بيركب 150 نفر تاني ركب 300 ريال
شوفوا معاي الاستغلال وصل لحد وين ؟
وااخر شي قال : انا ما يجيب دريل والحين خلاص دكان سكر انا يجي بكرة
صبح اوكي؟
عاشقة : شنو صبح كلش نفر نووم
والله اخر زمن صرنا نتكلم مثلهم
وتبادلنا ارقام الجوالات ههههههههههههههه حتى اتصل به الصبح عجييييييييب
لا ويقول لي حتى يتاكد ماما سوي مس كول
الحين هالغووووووول انا صرت امه
ثاني يوم قرر بوعيالي يجيب العصبي يركب اللوحات
جانا العصبي ومعاه مساعده شييييييبه لا وعصبي اكثر منه
وانا طحت بينهم وش يفكني منهم
كل ما قلت طقوا مسمار قالوا ماما فلوس زيادة
واللي زاد كلامهم التالي
عاشقة : يقدر يبطل هذا الباب؟
نجار 1: ايوا يقدر 30 ريال
عاشقة : شنو 30 ريال بس فك هالمسامير وانتهت
نجار 2 : ماما 20 ريال خلاص
عاشقة : لالا 10 ريال
نجار 2 عصب وقال: انت واجد فلوس انت شيخ انا في مسكين فقير
انت معلوم كم فلوس عشان يجي هنا ؟
معلوم ايجار مال دكان 3 الف و500
عاشقة : الله هو الغني . بعدين اشتغل ماابيك تقول قصة حياتك
وينك يابوعيالي تعال فكني منهم
ما يسوى علي نجار عصبي تجيب لي 2
ارتفع ضغطي فعلا
لان وين ما نروح نسمع نفس الكلام انت قطري واااااااااااااااجد فلوس
احس الحسد بعيونهم
وفعلا اكتب لكم الحوار اللي دار بيني وبينهم وانا مقهورة من الحسد والاستغلالية من العمالة وخاصة الاسيوية
بس بصراحة بعد ما راحوا نساني جمال اللوحات وتنسيق بيتي كل زعل
احبكم في الله
ومبروك عليكم قدوم الشهر الفضيل
وعساكم من عواده
السبت، 18 أغسطس 2007
الصديق وقت الضيق
اكتب موضوعي وانا بالسعودية .. لاني طول الطريق وانا افكر بعبارة ( الصديق وقت الضيق )
هل تعتقدون بصحة هذه المقولة ؟؟
لاني اصبحت اشك بوجود الصديق الوفي واللي وقت الضيق تلاقيه حولك
..
لو تغيب ثانية تلاقيه يسأل عنك ويتصل يطمئن عليك
يمكن انا حكمت بندرة وجوده
لاسباب وظروف مرت فيني
اقول في نفسي معقولة صديقاتي يختفون من حياتي بلا اي سبب
معقولة اللي بينا ما كانت صداقة
اجل وش اسميها ؟؟
ليش الناس تتغير لما تترقى في وظيفتك
وليش ينسونك لما تتقاعد من وظيفتك؟
معقولة الدنيا تنسيهم اجمل ما في الوجود الصداقة
بختم كلامي بجملة اخيرة
انا يتيمة الصداقة
الأربعاء، 15 أغسطس 2007
أمي
حبيت اكتب اول موضوع في مدونتي عن أغلى شي بحياتي
امــــــي
الله يرحمها ويسكنها فسيح جناته .. امين
افتقدها حيل وافتقد حنانها وابتسامتها
مع انها ما تعلمت بمدارس لكن تعلمت منها اشياء وايد واهمها الحياء
كانت تحاول المستحيل واكمل دراستي الجامعية
واصرارها خلاني اوصل لاعلى مرتبة في السلم الوظيفي ههههههههه على ايامنا
الله يرحمك يا امي ..
الاثنين، 13 أغسطس 2007
يا هلا ومرحبا بالجميع
الاشتراك في:
الرسائل (Atom)


