الأربعاء، 31 أكتوبر 2007

النسيان

النسيان ..نعمة ؟؟ ولا .. نقمــــة ؟؟



سؤال بطرحه على زوار مدونتي



أعاني من نسيان مؤقت للاسماء..للوقت



مثلا لما اتكلم عن موضوع صار لي مااتذكر هو صار امس ولا اول امس ولا ولا



لما تجيني دعوة لمجلس الامهات لمدارس عيالي اجهز افكار ببالي بطرحها على المعلمات او تساؤلات



وانصدم اني ساكتة مااتذكر شي ولا حتى منهج اولادي شنو فيه



اعاتب نفسي لما ارجع واقول ليش يصير فيني هالشي؟



يمكن القي اللوم على العين والحسد من الناس اللي مريت بهم وعشت معاهم سواء بالعمل او من الاقارب



لاني ذكية واحفظ كل شي



ومرات اقول يمكن العمر له دور



بس وحدة من اهلي صكت الثمانين وذاكرتها مية مية وما تنسى شي ما شاء الله عليها



بس احلى شي في النسيان .. اني انسى اساءة الغير



طلبي من القراء اعطائي حل كيف اعالج مشكلة النسيان عندي



دمتم سالمين

هناك 13 تعليقًا:

عثماني يقول...

مساج الله بالخير اخيتي عاشقة الترحال

انا ترى حالي حالج

النسيان صار مرض منتشر بسبب ضغوط هالحياة

انا قمت ما استغني عن كتابة النوت ...علشان ما انسى اي شي

غير معرف يقول...

مرحبا عاشقه والله يسعد مساج بكل خير

هالموضوع يذكرني ببيتين شعر للامير خالد الفيصل
يانعمة النسيان يا رحمة الله00لولاك انا عزاه اش كان سويت
لواذكر اللي كان دقه وجله00ماكان ساعه في حياتي تهنيت

اعتقد النسيان نعمه ورحمه للنتخلص من ذكريات او مواقف قد تكون مؤلمه للانسان
هالموضوع ذكرني بموقف صعب صار معاي لما نسيت ولدي تركي بالسوق :(

عاشقة الترحال يقول...

هلا باخوي عثماني

فعلا النوت مهمة جدا للناس الل ي بمثل حالتنا

تصدق ساعات يجيني خواطر وانا بالسرير

واقول اااخ لو عندي ورقة اكتبها

لكن النوم سلطان

شكرا لمرورك اللي احلى من العسل

دمت بود

عاشقة الترحال يقول...

هلا والله باخوي محمد

ماالومك لما تقول نسيت ولدك

لاني فعلا اعاني من النسيان

والاكيد ان هالشي صار لي من ضغوطات اتعرض لها

لاني حريصة واعتبر كل شي مهم بحياتي ومش عارفة شلون ارتب افكاري وابدأ بالاولويات

مرورك اسعدني

دمت بود

Shaima'a Alkandari يقول...

ماكو انسان ماينسى
واحيانا يكون نعمه من رب العالمين
لكن كتبي اللى بتسوينه علشان ماتنسين وحطيه بورقه بمكان انتى تشوفينه

عاشقة الترحال يقول...

هلا وغلا باختي شيماء

توقعت مرورك

احاول الان ادون كل شي ضروري ابي اسويه

تسلمين على النصيحة

دمت بود

Unknown يقول...

السلام عليكم

العملية نسبية وفي تمارين لتنشيط الذاكرة ولكن يا اختي الكريمة هذه الايام وتسارع الاحداث يجعل الشخص ينسي نفسه

تحياتى

اجار الدين كشمش يقول...

طبعا نعمه ! بس لا يكون هم..مثل

ما قالت ام كلثوم فضلت افكر بالنسيان لما بقى النسيان همي

ننسى الجروح القلبيه من فقد عزيز

بالموت او بالهجر .. او جرح الاهانه.. هذي قمتة النعمه من رب العالمين..ولولا النسيان لا اعرف ان اصف حال البشر كيف يكونون

تصوري لو نحن لم ننسى صبيحة الغزو من النذل صدام..
اما النسيان الذي تمرين به فهو

حالة الامبالاه وعدم الاهتمام
بالموضوع نفسه يجعلنا ننسى

الاسماء او الارقام ..يعني

الكسل.. هو سبب رئيسي

والله اعلم

غير معرف يقول...

مرحبا اخوي مشاري

شكرا على نصيحتك وبحاول ابحث عن هذي التمارين


وشكرا لمرورك ولا تقاطعنا

دمت بود

غير معرف يقول...

شكرا لمرورك اخوي اجار الدين


ومثل ما قلت النسيان احيانا نعمة


دمت بود

Shaima'a Alkandari يقول...

موجنه طالت الغيبه

وينج يالغاليه

ولهنا عليج واشتقنالج

وكل سنه وانتى طيبه واتمنالج هالسنه انج تذكرين كل شي حلو ومهم

Shaima'a Alkandari يقول...

طالت الغيبه عسى ماشر

اتمنى انج تكونين باتم صحه وعافيه يارب

عاشقة الترحال يقول...

انشغلت مع الاولاد .. نواجه مشكلة بالتعليم بقطر

الاولاد منقسمين الى حكومي ومستقل

ومواعيد الاختبارات متفاوتة ..كل ماارتاح من واحد قال الثاني يمه عندي اختبار..

خاطري اخذ اجازة وارتاح يا شيماء

تدرين فرحانة من كل قلبي لانك تسئلين عني

تحية من القلب للقلب .. والله لا يحرمك ممن تحبين